「白姐姐」白韻琴日前宣布泛民一旦落實五區總辭，佢就會參加補選後，半隻腳已經踏入政壇，不過，一向敢作敢為嘅白姐姐就絲毫不改作風，日前我哋喺銅鑼灣見到佢，一身白色裝束嘅佢喺百德新街等老公「法律超人」謝偉俊（Paul）接送，期間仲講電話添，不過，當街當巷下，只見佢將一腳踏上路邊欄杆，好似掛起半隻燒鵝髀咁傾偈，唔少路人都側目。
當晚七點幾，白姐姐一身白帽、白褲、白鞋，再加一件「花呢碌」嘅花恤衫企喺百德新街，離遠就認得出佢。只見白姐姐將右腳大髀放上欄杆，一邊講電話，一邊鵝髀曬月光。白姐姐平時會講三級笑話同疑似粗口嚟搞氣氛，估唔到佢嘅儀態一樣咁放！
講完電話之後，約莫過咗十分鐘，阿Paul終於飛的士趕到，仲落車行一段路去會合白姐姐，帶佢返回原先部的士！