「心中有數」好淡定

肥亨啱啱先宣布復出做上市公司揸fit人，估唔到環球經濟又起風浪，股市好似坐過山車、商品市場更好似玩跳樓機咁，呢啲景象喺肥亨眼中卻好似遊樂場玩滑梯咁，喺大學教經濟嘅肥亨好淡定，仲「心中有數」咁分析杜拜危機同金融海嘯嘅差別。

佢話，今次杜拜世界涉及嘅債務問題只係五百九十億美元，同金融海嘯嘅金融災難冇得比，因為，美國政府淨係挽救AIG集團都前後動用咗一千八百億美元，但當時美國何止一個集團出事？至於銀行壞帳，全球銀行嘅壞帳總額更高達八千億美元，同呢啲天文數字相比，杜拜世界嘅五百九十億美元危機就細好多啦！肥亨仲話小心係好事，不過，佢都認為：「市場嘅反應都過敏咗！」

原因係杜拜世界家吓只係話要重組債務，仲未話會賴帳，債權人未必需要將貸款全部撇帳，所以談唔上五百九十億美元凍過水。唔好以為肥亨咁講就係大好友，事實上，金融海嘯初起時，佢對經濟前景顯得好憂慮，話佢係淡友都不為過，絕唔係盲目樂觀一族。

重返商界嘅肥亨既係大學教授，又係上市公司高層，身兼多職可能令佢對世界經濟形勢更敏感及更貼身！