小白觀點：偏向虎山行證眼疾嚴重

有個女病人去明愛醫院睇眼科，院方話經評估之後列為非緊急個案，冇即時危及視力，真係離譜！其實明愛見錢至救人出晒名，竟然仲夠膽入去睇醫生，唔使醫生檢驗，證明病人真係冇帶眼入醫院，眼疾非常嚴重。

話時話，聽講公立醫院嘅高級大醫生經常飛去大車廠取經學管理，咁又係呀，佢哋醫學期刊未必期期睇晒，名車Catalogue就肯定刨到滾瓜爛熟。喺醫生眼中，人同車都係差唔多，眼有問題，即係等於車頭燈神咗；骨髓移植，咪等於換波箱油，全部都可以拖住先；至於年份耐咗咩，救番都冇用，放上二手車網平平哋睇吓有冇人要囉，再唔係，搵相熟車場劏咗佢，咁就一了百了啦。

網友觀點...X）...

[　dino　]

真係好衰㗎，總之你唔係盲住行入醫院，佢都當非緊急個案，唔盲都等到你盲。

[　零零狗　]

搞埋啲非緊急個案類別，好多症狀都可大可小㗎嘛，尤其係對眼。

[　Jackie　]

有錢都去咗睇私院啦，去公院真係要等九年，冇病都等到有病。

[　Donald　]

香港醫療服務真係差，一直都冇好過，叫啲局長唔好做咁多show，做番啲實務嘢好過啦~~

網址：www.sunsiupak.blogspot.com

阿豪觀點：蘇利民白幾百萬年薪

明愛醫院眼科又試嚟料！有個二十四歲女仔遊完泰國返香港，發現染上結膜炎，醫生將佢轉介去明愛醫院，點知院方居然話佢唔係嗰區居民，要去第二間醫院再排過。最好笑係，病人之後打嚟本報求助，記者去到之後，院方人員即刻變臉，仲有醫院領導人陪住睇醫生添！

醫管局總裁蘇利民幾百萬年薪，竟然叫唔郁明愛醫院啲員工接收病人？本報記者一出動，就立刻令到班人貼貼服服，不如由記者埋蘇利民份人工好唔好？

不過都係唔得，事關記者入主醫管局後，一定將依家個肥上瘦下嘅架構推倒重來，到時肯定宣布全體管理層減薪一半，到時班大帝同你死過都似！

網友觀點...X）...

[　working class hero　]

揭發多啲呢啲衰嘢啦，有啲人唔見棺材唔流眼淚㗎！

[　客迭　]

個病人畀醫院趕走，係咪因為佢冇帶錢呀？

[　赤練羅剎　]

香港醫院就嚟大陸化，見錢至肯救人，實行一國一制啦。

[　傻仔　]

可能見個病人自己可以打電話求救，斷定佢隻眼嘅問題其實唔係咁嚴重啩……

網址：www.lukchiho.blogspot.com