小白觀點：使公帑當使私己錢

審計報告聽日至發表，據講將狂數個人資料私隱專員公署最少七宗罪，包括豪花公帑為前任私隱專員鄧爾邦舉辦歡送派對。吳斌專員收到風即刻抵唔住頸，偷步違規發聲明強調自己冇「用公數開派對送老友」。

吳專員真係笨，審計報告不嬲都係冇牙老虎，使乜怕？佢老友鄧爾邦夠成日畀人將軍啦，咪又係繼續印印腳等收工，所以不如諗計反咬審計署啦！私隱、平機呢啲政治花瓶，從來都當正自己家天下，公帑等於自己銀包嘅錢，咁用私己請老友擦番餐，合情合理兼係個人私隱，審計報告踢爆私隱專員私隱，一於捉審計署署長入去坐番幾個月，睇吓仲有邊個夠膽「敲花瓶震虎」！

網友觀點......

肥力

個個政府部門都濫用公帑，真係唔想交稅！

RICK

嘩，專員都用公帑豪搞farewell，政府上上下下咁多高層，一年都花唔少公帑耍樂，盤數好襟計。

soso_009

財赤條數有冇計埋各部門farewell數、海鮮數先？呢啲數市民唔認㗎！

唔順氣

仲夠膽違規發聲明，話冇用公帑開party，人哋一定有證明至知道有條咁嘅數啦，仲死撐！

網址：www.sunsiupak.blogspot.com

阿豪觀點：吳斌面皮厚算死草

唔好以為得平機會主席鄧爾邦大花筒，聽講就快公布嘅審計報告會狂數私隱專員吳斌都係一擔擔，用公帑為前任專員鄧爾邦搞盛大歡送派對。政府攞咁多公帑養呢拃資助機構，同將錢掟落鹹水海有咩分別呀？

諗深一層，雖然鄧、吳兩個都係大花筒，但係吳斌面皮可能仲厚啲！唔係啩！鄧爾邦畀立法會帳委會「極度遺憾」都不為所動，仲有人面皮厚得過佢？大家記唔記得舊年私隱專員公署年報顯示外訪支出多咗，竟然仲繼續伸大手板問政府攞經費，連幫政府部門搞講座都話想收錢，問你怕未？吖，唔知係咪公署當年幫鄧爾邦搞派對時，畀人投訴冇提供埋「大使級套房」呢？

網友觀點......

傻仔

鄧爾邦都算自私，自己環遊世界都唔拍啲片段返香港播，咁我哋使乜請佢？

匿名

開party呢啲私人活動，點解都可以用納稅人嘅錢呢？

Danny Chan

廢柴政府養班廢柴高官，淨係識用公帑嚟自肥！

匿名

兩個都咁無恥！

網址：www.lukchiho.blogspot.com