22/11/2009

播放本新聞相關短片

政情:畀市民狂轟德成局長知衰

本文重點
仲有兩個禮拜本港就會舉辦東亞運動會,今次係香港首次舉辦綜合性大型運動會,但喺興建場地、宣傳同售票方面都問題多多,搞到有啲賽事要取消,有啲賽事就有空位多過人頭嘅憂慮。政府高官之前一直懶理唔理,直到東亞運殺埋身,民政事務局局長曾德成尋日先認低威,承認幾方面都可以做得好啲;不過,東亞運籌委會主席霍震霆就不改唱好本色,仲話要憑今次嘅成功申辦亞運添。

德成局長尋日出席節目時,畀幾個市民phone-in狂批,譬如話資訊混亂、冇場地舉辦賽事,甚至買咗門券嘅市民鬧家吓都未知到時可以睇邊隊打邊隊。一輪狂批後,睇怕唔少買咗飛嘅市民都開始呻笨。

臨急搵贊助商

近排變咗東亞運代言人嘅德成局長聞言都認衰,話政府可進一步加強監察,喺發布賽事日程時可以做得更好;至於門券賣剩好多,佢就諗咗條屎橋,話會考慮搵啲贊助商,以贊助形式畀弱勢社群都可以去睇比賽。咁咪變相再送飛?即係話,今屆東亞運嘅門券分分鐘有半數都係夾硬送出去嘅零成本飛,觀眾缺席睇賽事機會好大,德成局長真係要驚定到時賽場入面空櫈多過人頭!

體壇老手霍公子尋日都有出席另一場合,被問到東亞運籌備嘅批評時,佢依然一副強者姿態,話香港有上次協辦京奧馬術賽事成功嘅經驗,今次東亞運都會辦得好,仲話呢啲經驗可以增加香港申辦亞運嘅機會,家吓已經有兩三個地區有意爭辦,佢仍然顯得滿懷信心。

不過,政圈中人話,政府同體育界都以為舊年本港順利協辦京奧馬術賽,因此東亞運都一樣可以搞得咁成功,但舊年有資深前高官林煥光坐鎮馬術公司,又有北京奧組委監督,今年就完全係香港自己頂,搞成點真係冇辦睇㗎!