唔講唔知，講起就嚇一跳。原來平機會每年使咗七千幾萬公帑，請咗八十幾個職員，但係喺○七至○九年內，總共只收到七十四宗有關《殘疾歧視條例》嘅法律協助申請，其中十二宗已入稟法院，兩宗經審訊結案，平均每年處理不足五宗訴訟，但無理取鬧嘅投訴就多達四百幾宗。

啲訴訟少成咁，一個合理解釋係，香港根本就無幾多嚴重歧視事件，所以毋須對簿公堂；另一個合理解釋係，平機會辦事能力奇低，根本無法發揮應有作用；而太一叮傾向另一個更加合理嘅解釋，就係上述兩者同時存在。問題係，既然歧視唔嚴重，而平機會又無法發揮應有作用，咁仲要平機會嚟做乜？

不過講開唔公平，香港又唔可以話完全無嘅，尤其係平機會成立以來，確實係製造咗唔少不公事件。譬如撩是鬥非為中學男女生嘅派位辦法提出訴訟啦，譬如挑撥離間幫一位傷殘女博士入稟控告同樣係傷殘嘅的士司機啦……醫管局管理混亂人人喊打，間間傳媒都批評，但○六年九月《太陽報》發表咗一篇文章，內容明明係針對醫管局規劃失當，竟然畀平機會喺今年中引《殘疾歧視條例》起訴。

仲有啊，平機會對圍外人就唔公平，對自己人就「公平」到加零一，諸如一人一部打印機，一步一部清新機，總之八十幾人有福共享。○五年，平機會主席鄧爾邦帶班手足北上訪問，一口氣使咗十六萬蚊；○七年，鄧爾邦應邀到瑞典「訪問」，雖然由對方包晒機票、住宿、膳食，依然使咗四萬蚊。叮！啲平機會高層遊山玩水逍遙快活，市民就要用公帑供養呢班蛀米大蟲，唔通咁都叫公平？

同樣係唔講唔知，原來喺古代中國，水中殺手鯊魚一向被叫做「鮫魚」。大家不妨想像一下，政府每年攞出七千幾萬，搞咗個叫「平機會」嘅大池塘，裏面養咗八十幾條無所事事嘅鮫魚，其中最犀利嗰條叫鄧爾邦，呢條大鮫魚因為無齒嘅關係，食唔到人，淨吞公帑，坐飛機要坐商務客位，住酒店要住大使套房，仲有本事未經批准用公帑幫自己買超豪保險，當納稅人啲血汗錢垃圾咁倒。

匪夷所思嘅係，即使鄧爾邦浪費公帑激起公憤，但政府依然貫徹唔問責、唔炒人嘅陽光政策，畀佢做到明年一月任滿，百幾萬約滿酬金袋袋平安。而更加離奇嘅係，政府不但無諗過檢討平機會嘅存在意義，反而建議將鄧爾邦個筍位一拆為二，一個主席，一個行政總裁，一邊話公開招聘，一邊已傳出內定人選嘅消息。換言之，平機會個大池塘走咗一條無齒鮫魚，好可能換嚟兩條內定鮫魚，真係愈來愈多鮫魚。

平機池塘多鮫魚，浪費公帑真不該。唉，今時今日，全港貧窮人口已經超過一百二十萬，但啲公營機構就愈來愈肥，好心政府摺咗平機會呢個不倫不類嘅怪胎，慳番啲錢扶貧好過啦，叮！