不過，尋日政務司司長唐唐喺立法會宣讀政改諮詢文件聲明，平時如非施政報告或預算案都唔會現身嘅行會成員，就有七個畀面去撐場。話說唐唐未發言，六個行會成員已經排排坐好，就連平時冇乜點現身嘅查史美倫同楊敏德都嚟埋，大家仲夾好，留空中間一個位畀去咗午宴嘅行會召集人CY梁振英；而搞作多多嘅CY冇托手㬹，兩點前趕到立法會，叫做撐咗半場。

雖然佢哋表面扮齊心，但都唔交戲，更加彰顯只係假撐政府。喺唐唐宣讀期間，唔知佢哋係太悶定唔慣，有人開始瞌眼瞓，有啲就索性閉目養神，有啲就拎電話出嚟玩，仲有人拎手提電腦出嚟處理文件，當唐唐喺度發噏風。

好彩臨尾佢哋都仲識一字排開，企喺CY後面做人肉布景板扮團結同一條心，但已經太遲喇，佢哋就好似一支爛芯鉛筆咁，表面睇好「四正」，但其實入面嘅鉛芯斷開一截截，你還你我還我，仲有乜作為吖！

點解CY會遲到？原來喺同一時間佢喺扶輪社午餐會發表演說，題為「香港的政治現象、民生面貌和經濟對策」，成份競逐特首政綱咁款。佢到場即刻喺記者席坐低，明顯係要主動出擊，就政改諮詢發聲護航。事後有記者問CY，怕唔怕畀人話特登同唐唐打對台呀？CY笑笑口咁話個午餐會一個月前約好，又話對選特首冇新消息公布。