鯊魚瀕臨絕種引起環保團體關注，好似美國野生救援協會近年就先後邀請六個中國體育明星做形象大使，包括尋日剛委任嘅奧運跳水金牌得主、「跳水公主」郭晶晶，呼籲大家要保護鯊魚。由於晶晶突然患重感冒未能出席發布會，佢透過電話話，其實保護野生動物唔使做乜嘢大事，唔食魚翅就得嘞！
晶晶話將會盡最大力量，令到更多朋友關注保護鯊魚，拒絕食魚翅，共同保護生態環境。究竟晶晶最終說服到幾多人拒食魚翅呢？相信佢男友霍啟剛唔會唔支持女友啩？
上禮拜日佢出席一項商業活動時自稱身體狀態良好，但呢幾日忽然患上重感冒，實在令人擔心會唔會影響佢下月來港參加東亞運動會跳水三米板比賽，事關好多粉絲都期待佢嘅精湛表現，希望佢快啲好番恢復最佳狀態啦！