程介明尋日以香港大學校長資深顧問身份，出席津小議會嘅周年大會，佢講笑咁話顧問嘅身份其實即係幫手籌款，希望達到所有港大學生都可以去外國交流嘅目的。佢話識得一個哈佛學生，畢業作業就係坐艘四十七呎長嘅船周遊列國，同行嘅只有一個水手同三個學生，四個同學仔去咗十幾個發展中同發達國家，體驗各地嘅文化。
其實佢去過唔少國家睇各地嘅教育模式，最開眼界係一間印度南部嘅學校，學校要求學生畢業前出去街邊搵兩個街童，勸佢哋返學校讀書，如果勸唔掂，學生就唔使旨意畢業。佢講笑咁話香港都可以學吓，要老師去勸掂一個成績肥佬嘅學生，變番成績合格嘅學生喎。
為咗擴闊學生嘅國際視野，佢出任校董會主席嘅弘立書院未來仲會資助幾位學生遠赴美國，由校長帶隊，探望新一屆諾貝爾物理學獎得主、「光纖之父」高錕，暫定時間係高錕出席完喺瑞典舉行嘅頒獎禮後，到時會直接到高錕屋企分享佢得獎嘅喜悅。