信和置業主席黃志祥今年年底會好開心，點解？因為就嚟做阿爺囉，仲係抱男孫添！黃志祥公子黃永光將榮升爸爸，尋晚入馬場為愛駒「永利多」打氣時，心情勁興奮，笑笑口咁透露太太「隨時生得」，咁啱尋晚「永利多」贏頭馬，確係雙喜臨門。
其實黃志祥、公子黃永光同千金黃敏華尋晚係入到馬場先知道大家都嚟咗，結果「永利多」不負眾望跑出，三人齊齊落場拉頭馬，黃志祥仲開埋香檳慶祝添！被問到榮升爺爺心情如何？黃志祥好開心咁話：「高興，梗係高興啦！四代同堂嘛！」
問黃志祥會唔會幫孫仔改名，佢話呢樣應該由爸爸永光去做喎！究竟改咗個乜嘢名？永光話要賣個關子，到出世時先公布。拉完頭馬後，永光就急急腳一個人離開馬會，莫非趕返屋企照顧太太？