克勤仔尋日喺立法會批評政改新建議「遞」奪委任區議員嘅投票權。吓！「遞」奪？話聲一落，政務司司長唐唐就同主席講，聽唔清楚條問題，主席於是轉述問題，順便當面糾正克勤仔，話「褫」字應該讀成「雌」音，引發哄堂大笑，克勤仔不知幾尷尬。但查實主席都發錯音，根據字典，「褫」應讀「始」音至啱。

立法會主席糾正完克勤仔之後，順便踢爆埋議員「鐵頭仁」何俊仁，話鐵頭仁頭先讀「飭令」一詞讀錯咗做「勒」令，應該讀「飾」令先啱。