富貴黨創黨黨員呂志華尋日登全版廣告，指黨嘅「敵人」係有中央支持嘅專業人士，佢哋令富貴黨喺舊年立法會選舉錯失兩個直選議席，矛頭直指龐愛蘭同梁美芬。呂志華嘅口氣酸溜溜，講到人哋搶飯食咁。
尋日見到富貴黨常委田北辰，佢一聽到問呂志華篇文章已耍手擰頭話冇聽過，事前完全唔知情，但就尊重黨員嘅言論自由。佢仲話呂志華既唔係常委又唔係中委，佢嘅意見絕對唔代表黨嘅意見，同呂志華劃清界線。
不過，田二少話呂志華嘅分析有錯，佢指影響立法會選情嘅因素有好多，即使有勢力人士指明要某個人喺某個區選出，二少都質疑「係咪咁就贏到？」
另外，呂志華指富貴黨同中央嘅關係一直都係「和而不親」，田二少反應更大，斬釘截鐵咁否認。田二少話佢哋同中央係「親」，但未親到「翹埋雙手唔使做」都得到中央支持嘅地步。