尋日先由首席推銷員政務司司長唐唐喺立法會就政改諮詢文件發表聲明，跟住煲呔曾喺另一場合回應傳媒提問，然後再輪到唐唐拖埋政制及內地事務局局長林瑞麟開記招。

不過，唐唐喺立法會發表聲明後，倒水咁多議員排隊發問，足足搞咗兩粒鐘先問完。呢邊廂議員問完唐唐，嗰邊廂煲呔曾就喺相隔大約五分鐘路程嘅政府總部新翼見傳媒，更加離譜嘅係佢講完開場白後，只係答咗一條問題，就自言自語咁話遲啲佢嘅團隊如唐唐等人會詳細解答大家嘅問題，跟住就轉身走人。

廢噏「細心聆聽 求同存異」

老實講，若果只係發表聲明嘅話，事前應該講明冇答問環節，但呢次大反常態，竟然答咗一條問題就快閃，雞咁腳鬆人，令在場嘅記者怨聲載道。

煲呔曾快閃嘅原因眾說紛紜，其中一個版本係同泛民主派遊行有關。話說泛民事先張揚尋日會拉大隊操上政府總部示威，矛頭當然係指向煲呔曾啦。咁啱，煲呔曾以雙語讀完份聲明後，班泛民差唔多操到去政府總部，可能因為咁，佢答完條問題就要快閃，否則喺門口撞到正，都幾難甩身；再加上走激進路線嘅社民連更講明會走上禮賓府抗議，所以佢仲唔乘機走快啲龜縮返禮賓府咩！

煲呔曾喺聲明度話會細心聆聽、求同存異，唔會同市民愈走愈遠，而係要愈行愈近，點知遇到持唔同意見嘅泛民，竟然掉頭走，簡直係自摑一巴。

正所謂黑狗偷食、白狗當災，尋日連建制派議員林大輝都狂質唐唐，問煲呔曾係咪唔遵守競選承諾先？之後唐唐喺記者會上又被問到，政府民望低會唔會增加推動政改嘅難度。唐唐好坦白咁話低民望係困難啲，只能夠希望市民同政黨都客觀、理性啲睇啦！講到尾，都係煲呔曾惹嘅禍！