小白觀點：科學研究一時一樣

消委會發現好多包裝飲品甜過糖水，細路仔飲咗之後，想唔癡肥都難！弊在呢啲咁嘅所謂科學研究一時一樣，呢，最近外國有個醫學研究就為卡路里大平反，話原來一直以嚟計算攝取量嘅標準大錯特錯，成年人每日食多個芝士漢堡包都唔怕肥。

呢樣又話致癌，嗰樣又話高膽固醇，做人仲有乜意義？好彩小白老弟對飲酒可以預防心臟病、咖啡可以防癌之類嘅正面新聞特別入耳。你知啦，呢個政府涼薄成咁，難保有朝一日要去食物銀行攞嘢食，冇理由揀三揀四同個社工講：「罐頭會令人生cancer，唔要！即食麵有蠟會食壞人，唔要！有冇新鮮西冷扒同埋阿拉斯加長腳蟹呀？」

網友觀點...X）...

[　阿　晞　]

仲叫人everyday一支添喎，靠害咩！

[　穎　盈　]

應該要轉口號啦，「今日三粒未？」

[　Wilson　]

通常報告數字一定嚇死人，邊驚得咁多吖，個個咪又係照飲照食，一於少理。

[　細細粒　]

咁講法飲乜都死，咪齋到要飲水？以後去7仔都要計吓條糖數至買飲品咯。

網址：www.sunsiupak.blogspot.com

阿豪觀點：賣水喉水都有商機

消委會最近調查發現，原來市面上好多標榜「無糖」、「少糖」嘅飲品甜到漏，其中一種細細支嘅飲品，一支已經等於三粒方糖，問你怕未？

依家食乜嘢、飲乜嘢都有人話唔健康，咁不如以後大家索性飲白開水算罷啦。你咪以為豪伯喺度講笑呀，紐約就真係有一個o靚仔，今年初忽然諗起，點解唔將水喉水包裝得靚仔啲出售呢？好多人聽到都話佢異想天開，但你咪理，呢種樽裝水喉水推出之後，竟然大受歡迎，據講原來好多人出到街都突然想飲番啖「清新」嘅紐約水喉水喎。

其實政府大吹六大產業都係假，索性自己種菜然後攞去賣，肯定仲有商機啦！

網友觀點...X）...

[　Patrick Lai　]

人哋只不過係一句宣傳口號啫，好似話「路上零意外，香港人人愛」咁，有冇人天真到真係信呢？

[　匿　名　]

不嬲都知「溺力多」係甜，不過好易飲飲吓就兩支，原來真係咁多糖，以後都唔會多飲lu～

[　港　女　]

依家去親茶餐廳，都一定嗌少甜，不過有時都仲覺得好甜，都唔明點解茶餐廳加咁多糖水……

[　無糖不歡　]

估唔到連聲稱無甜嘅飲品，都有糖分，咁憑咩叫做「無糖」？咁係咪即係欺騙顧客？飲咗係咪可以告佢？

網址：www.lukchiho.blogspot.com