咦，政府好似有啲「好消息」公布喎，就係八月至十月份嘅最新失業率，已經由七月至九月份嘅百分之五點三微降到百分之五點二嘞。嗱嗱嗱，啲高官又開始吹嘞！勞工及福利局局長張建宗喜氣洋洋話你知，喺新一季失業數據中，幾乎所有行業都有改善，尤其係十五至十九歲青少年嘅失業率顯著下跌三個百分點至百分之二十二點七，反映青少年嘅失業問題已經逐漸緩和。

唉，本來見到失業率稍稍下降，太一叮都感受到微若游絲嘅暖流，但係聽到張建宗咁吹法，當堂心都寒埋。老實講吖，失業率由百分之五點三降到百分之五點二，係就係跌咗，但都仲係高企吖嘛，尤其係啲青少年，兩成三人失業都叫做「緩和」，根據呢種官僚邏輯，張局長食咗一粒蠶豆都可當係豐富大餐！

等太一叮話畀大家知啦，其實青少年搵工一向都難，金融海嘯固然有好大影響，但最根本嘅原因就係政府近年頭腦發熱獨沽金融，搞到其他行業不斷萎縮，後生仔嘅出路愈嚟愈窄，啲學歷稍低而入唔到金融業嘅，咪惟有做量地官囉。所以話呢，今日青少年失業率由高位回落，只反映外圍形勢稍有好轉，而失業率仍然高達兩成三，就反映產業轉型同多元化發展依舊原地踏步，政府根本無去解決呢個結構性問題。

再攤開盤數睇真啲。嗱，總失業人數係就係少咗一萬八千幾，但總就業人數亦少咗七千二百，總勞動人口亦少咗二萬六千喎。到底嗰二萬六勞動人口去咗邊呢？啲高官無講，但係經濟學教科書白紙黑字說明，有部分係因為長期搵唔到工心灰意冷，所以主動退出勞動市場。官老爺呀官老爺，到底嗰三個巴仙後生仔有幾多係屬於呢種情形？又有幾多係搵唔到工重返校園？太一叮好好奇，可唔可以講多啲嚟聽吓呢？

其實，就算有工做嘅市民都未必好得去邊，事關數據同時顯示，就業不足率依然維持喺百分之二點四嘅水平。香港回歸十二年，貧窮人口多咗成倍，十九萬戶在職家庭收入低過綜援。太一叮好想問問張建宗，到底佢哋嘅苦況幾時有得「緩和」？啲市民日做夜做，但收入仲低過綜援，唔通咁都叫「所有行業都有改善」？

叮！講開幫市民搵工，張建宗個勞福局本來就責無旁貸，但係早前有位市民去勞工處搵工，發現貼出嚟嘅竟然係幾個禮拜前嘅空缺。事關勞工處職員按部就班龜速處理，結果市民寄出求職信後，先知有關職位早已聘得合適人選，同個就業機會擦身而過。

吹多無謂，食多會滯。啲經濟寒風繼續吹呀吹，好心你啦張建宗，返去叫啲高官腳踏實地創造就業，同時睇緊啲勞工處嘅手足，叫佢哋快快手手幫人搵工，再咁吹落去，啲市民遲早要食西北風啊，叮！