近期本港樓市大升，股市熱炒，名人圈到處都聽到人講樓經股經。不過，亦有城中富豪完全唔沾手炒樓炒股，工業家蔣震早前出席酒會時透露，佢呢世人只識一心一意搞好工業，既冇炒樓亦冇炒股。佢仲講笑話：「可能我冇人哋咁叻，一定要專心做一件事先做得好，如果一邊炒樓炒股，一邊做工業，肯定兩邊都兼顧唔到。」
佢講得好謙，但對樓市有冇泡沫就心水好清，佢話：「好難講依家嘅情況係冇泡沫，（泡沫）亦係資本主義特色，冇人可以干預，總之賺蝕都係投資人負責。」佢仲話，本港係小型經濟體，好睇美國同世界頭，即係美國同世界嘅經濟走勢對本港影響好大，佢仲觀察到美國經濟似已露出復甦嘅勢頭。
當晚酒會好熱鬧，年屆八十六歲嘅蔣震不時喺場中穿梭應酬，好似後生仔女咁活躍，問佢有乜養生秘方時，蔣震微微一笑：「我嘅秘方人人都做到，三不就得，不煙不酒不夜生活。」佢仲話，每日堅持散步四十五分鐘，吸吓新鮮空氣又活動吓身體。咁幾時退休呀？蔣震睩大對眼話：「我哋呢啲私人公司老闆只有做到死嘅啫！」佢仲補充番，家吓有仔女幫手，返工嘅時間比以前少咗好多囉。