據了解，唐唐上個禮拜三喺佢嘅山頂政務司司長官邸約見專業會議，今次嘅約會，第一檔係工聯會，但只係見會長鄭耀棠同黨團召集人黃國健，第二檔見建仔，亦只有劉江華等幾位高層。點知專業會議四個人見完佢後，大剌剌行番立法會，梁美芬一見記者就衝口一句：「我哋見咗唐英年之嘛。」

在場記者估到傾政改，一輪窮追猛打，梁美芬先話唔知講唔講得，等佢問過特首辦主任譚志源先，跟住佢行入立法會前廳，然後又返出嚟話唔可以講，但被人問得兩句又乜都講晒。據現場直擊者講，石禮謙同黨友對住記者口若懸河，知道領嘢，於是遠遠嗌過去，叫梁美芬「聽電話」，兩人拉埋一邊密斟一輪之後，返轉頭同記者講：「原來唔講㗎！」不過，潑出去嘅水邊收得番呢？結果唐唐就要為佢嘅政治智慧低補鑊。另一方面，政改出籠，建制派嘅每月武林大會亦要改期，由今月二十七日改為二十日，即係文件公布後嘅兩日。