恒基主席「四叔」李兆基搞地產起家，尋日佢出席科技大學擴建新校園嘅動土禮時，見到擴建校園嘅地皮背山面海，環境優美，仲有海景添，佢即刻話，呢度如果興建低密度別墅，價值應該超過五十億元，實在千金難買！四叔三句不離老本行，仲藉此勉勵學生，喺咁靚嘅地皮讀書，真係要好好珍惜、畀心機讀書，將來為香港和國家繁榮出一分力！
四叔早前捐出四億元畀科大，促成今次擴建，尋日佢由大女李佩雯、二仔家誠及新抱徐子淇等陪同下主持動土儀式。尋日下午西貢氣溫只有八至九度，四叔厚西裝加冷衫同頸巾，但儀式喺半山戶外舉行，寒風刺骨人人難免凍到震騰騰，四叔致詞嗰陣更要一邊猛索鼻水。身穿Gucci大褸嘅子淇就依偎喺老公家誠身邊取暖，恒地旗下香港小輪發展部董事鍾麗幗仲着埋皮草添！
徐子淇嘅父親近日又因伯父嘅財務糾紛被捲入是非，子淇尋日劃清界線，重申事件佢同阿爸全無關係，從小到大好少與伯父聯絡，事件已交律師跟進。至於需否請多幾個保鏢，子淇好淡定話：「咁又唔使，做人行得正企得正，沒必要擔心！」