前特首辦主任林煥光（WK）尋日現身樹仁大學出席一個講座，同三百位新聞系學生分享人生價值觀，呢個「問問我是誰」嘅講座本嚟好正路，點知WK不自覺牽連到當年嘅婚外情，向學生介紹自己時，主動引述維基百科有關佢嘅描述，來個自我引爆，承認當年搞婚外情係事實，學生見佢答得咁坦白，趁答問環節時窮追不捨，問WK有否後悔搞婚外情、付上代價係咪太大？
當年WK背住太太與女性朋友布穎琪同遊日本，被傳媒捉個正着，政壇好先生形象扣晒分，之後仲離開咗特首辦，代價係咪太大？WK無迴避問題，仲來個真情剖白，話婚外情事件發生後承受好大壓力，最困難唔係面對傳媒同作出遞信辭職嘅決定，而係唔知點面對家人：「至親人士所受嘅傷害，唔係我講句『我負責』就可以彌補到！」講到呢度WK忽然沉默咗十幾秒，幾乎想喊出嚟！
不過，WK並無講到事後點樣處理呢段三角關係，只透露依家係住家男人，單係處理家頭細務已經周身唔得閒，最新嗜好係學日文同上佛學班，咁會否學某啲高官咁下海從商？WK笑言依家生活唔算窮，做又得，唔做又得，若然新工作唔牽涉利益衝突，會考慮吓喎。