本文重點
近期金融市場有水浸香港之勢，四方八面嘅熱錢湧個不停，搞到香港嘅資產價格升完又升，好多金融圈名人都先後發出警告。到新加坡出席亞太經合組織峰會（APEC）嘅曾蔭權被人問到聯匯問題時，佢竟然話：「我任內港元與美元不會脫鈎。」搞到人哋大肆報道：「至少三年內，港元與美元不會脫鈎。」變相為聯匯添加限期。聯匯係影響香港以至國家金融安全嘅大事，煲呔曾將聯匯同佢嘅任期綑綁，真係不知所謂，唔通佢以為自己係皇帝？
煲呔曾一貫噏得就噏，亂噏嘢嘅紀錄厚到好似本黃頁咁，估唔到嘅係佢出訪外地都一樣亂咁噏。日前佢喺新加坡參加APEC峰會後，順道訪問當地，去咗星總統府、又同國務資政吳作棟會面，就環境經濟背景、區域發展及香港政經發展等議題交換意見。之後佢就喺新加坡管理大學一個「亞洲領袖公開講座」亂噏嘢。
扮晒皇帝亂噏
佢除咗話自己最大嘅錯誤可能係做香港特首外，席間有人關注最近各方熱錢湧嚟香港催生資產泡沫，市場不斷出現有關港府會優化或將聯匯脫鈎嘅傳言，煲呔曾回應時扮晒皇帝亂噏話，佢在任期間，港元與美元唔會脫鈎，亦唔會更改港元兌美元匯率嘅波幅下限。佢呢番話被人解讀為本港聯匯三年內唔會改，但三年後……各自解讀啦。
眾所周知，聯匯係本港金融安全最緊要嘅一關，向來係高度敏感嘅議題，同特首任期根本毫無關係，況且煲呔曾依家民望插水，係咪做得晒餘下嘅三年任期，其實都冇人講得準，佢無喇喇將聯匯同自己任期拉埋一齊，真係捉蟲。如果國際炒家喺臨近二○一二年七月時嚟衝擊港元，萬千港人肯定損失慘重，好心煲呔曾唔好咁烏鴉口啦！