小白觀點：拍恐怖片就最啱

真係世風日下，依家啲後生仔有書唔好好讀，淨係識得發開口夢，以前嗰代雖然一樣唔腳踏實地，但發嘅叫明星夢，希望可以有朝一日衝出亞洲，勇闖荷里活，可以喺西片間唔中充當妖化中國人嘅角色。

唉，點似得家陣啲o靚仔o靚妹咁冇志氣，發o靚模夢，連Game模都唔放過，攻日竟然成為畢生目標，真係一蟹不如一蟹！好心啦！睇見嗰啲小朋友，一係就生得三尖八角，一係就四呎都未夠，求其搵個CatWalk Model條腿都高過佢哋，最弊嘅係，做童裝又大咗啲，不過加上嘟嘴V手呢啲恐怖動作，都唔係冇市場嘅，但要等波蘭斯基坐完出嚟，睇吓會唔會拍《魔鬼怪嬰》續集咁囉。

網友觀點......

力奇

依家o靚仔識啲乜吖，日日拎住部遊戲機過日子，過着虛擬生活，連阿媽姓乜都未知。

永遠支持妳！

做o靚模都衝出日本喎，你睇吓我嘅偶像Chrissie，幾咁勁！

Kitty

書都好讀㗎咩，讀完都搵唔到食，做Game模行行企企影吓相就出名，幾easy！

Oscar

父母想仔女成龍，仔女就想成模！激心激肺咯！

網址：www.sunsiupak.blogspot.com

阿豪觀點：搵到錢就係好模

有電子遊戲公司日前打正旗號招募Game模推銷產品，就吸引超過二百個少男少女爭嘞。唔知大家有冇覺得有啲奇怪呢？之前就話興o靚模，明明係以年齡嚟做劃界，跟住又出現所謂「模art」即係做artist嘅o靚模，即係用工作性質嚟劃分，再到依家嘅Game模，又改為用佢哋推銷嘅產品嚟劃分，咁遲啲如果有模特兒專門替音響產品拍廣告，咁唔知又應該叫乜模呢可？

不過唔理o靚模定係老模，搵得到錢就係好模。咁就啱嘞，其實後生仔女抱住搵食心態去做o靚模就啱嘞。打份工有咩求呀，咪又係求餐溫飽，又點會咁蠢畀人氹到交埋晒啲咩「培訓費」、「報名費」呀？

網友觀點......

尖子

咁我又問你嘞，唔做o靚模做乜好？唔通讀副學士呀？

客迭

我又要做Game模，我個樣，唔化妝都似怪醫秦博士……

卜勤之王

做Game模，好過做援交（賣淫）。是但啦，各個年代都發明星夢。

既生奴

咁又係，其實援交同Game模都係一份職業，用勞力換取金錢啫，無分貴賤。

網址：www.lukchiho.blogspot.com