你一定懷疑主持人個腦係咪燒壞咗。之但係，如果你睇咗嗰單滅火筒爆炸嘅新聞，你就會覺得佢都唔係完全冇道理。

話說嗰日有班再培訓學員上課，學習使用滅火筒，忽然「砰」一聲巨響，滅火筒爆得粉碎，鐵片好似風車葉咁亂飛，一個愛心女義工當場中招，削咗半邊面，牙甩眼爆，慘不忍睹。佢一心以為參加課程之後可以轉番份好工，點知搞到毀容兼失明。

話時話，點解滅火筒會變成炸彈嘅？睇吓學者點講。佢話喎，欠保養嘅滅火筒瓶身因生銹會變得脆弱，無法承受使用時嘅壓力就會爆炸，威力至少一百五十磅。所以火災時唔單止救唔到人，反而會產生危險，行內都形容係炸彈。

本來香港法例規定，滅火筒每年要通過一次檢查，每五年通過一次壓力測試，唔合格嘅十四日內就要更換。若果執正嚟做，就唔會有滅火筒變炸彈呢家嘢。之不過，好多業主立案法團有法不依，唔係消防巡查發現發出警告信都唔肯換，令法例形同虛設，唔出事至奇。叮！

其實，又唔可以話政府乜嘢都唔做噃，消防處發言人話，過去三年平均每年巡查樓宇消防裝置六、七萬宗，但去年全年發出三千八百份「消除火警危險通知書」，只提出九宗檢控，今年頭十個月發出二千份通知書，檢控亦只得七宗咁大把。

即係話，有人有法不依，但當局又執法寬鬆，咁邊度有阻嚇力吖。嗱，本報記者早排巡查各區大廈，隨處都發現問題滅火筒。喺大角咀一幢住宅大廈，好多個滅火筒瓶身已經生銹，有效日期係○八年八月，即係過期超過一年。土瓜灣一幢住宅樓宇嘅滅火筒經過檢測，全部唔合格，但係過咗成個月仲未換。有起事嚟，呢啲滅火筒分分鐘變成炸彈，不知害到幾多人。

畀記者捉住痛腳，當局冇聲出㗎啦，仲唔快快趣趣做番啲嘢？但係你急佢唔急，消防處發言人話喎，部分個案會以酌情權處理，給予額外寬限期咁話。咁即係點呀？

當局有寬限期，但係祝融唔會有寬限期，無情火發起威嚟，唔係人咁品，到時嗰啲問題滅火筒唔單止救唔到火，仲會炸到噼哩啪啦。

立法會議員講得啱，消防處以後應加強宣傳同巡查，令市民唔好忽略年檢同更換滅火筒嘅必要性，以前社會對滅火筒潛藏危機認知唔多，今次爆炸意外正好引以為鑑。叮！