原來喺病榻中休養嘅賭王全程實賽馬轉播，睇見「爆冷」輸咗，一定唔開心喎。賭王有精神睇賽馬，唔知聖誕節出得院未呢？四太話屋企大宅裝修緊，沙塵滾滾，為免賭王吸塵有礙健康，起碼要等到十二月至可以接佢返屋企。

金刀梁買馬票大包圍

另外，馬會推出已銷聲匿迹好耐嘅馬票玩意，行會成員「金刀梁」梁智鴻夫婦都花咗四百蚊狂掃二十張馬票。梁太笑言細個時幫媽媽喺茶餐廳買過馬票，可惜冇中獎；而金刀梁亦唔多清楚馬票嘅玩法，一於大包圍買晒成套。係咪瞄準價值一千二百五十萬元嘅黃金，志在必得？金刀梁笑騎騎咁話中獎嘅話，會搵埋記者幫手抬錢喎！