葉劉向一對新人傳授夫妻之道：「學我咁，桄榔樹一條心。」佢仲話成個婚禮令佢最印象深刻嘅，係榮升老爺嘅鄭家純上台憶述阿仔成長過程嗰幕，純官話志剛由細到大都好獨立，令身為父親嘅冇乜好擔心，依家只希望新抱減少工作量，等佢可以早日抱孫喎。純官仲罕有咁大談夫妻相處之道，笑言做老公最緊要「忍」，做老婆就要喺公眾場合畀足面老公，要跪玻璃、頂痰罐就閂埋房門先罰。