港人慣咗先使未來錢，買嘢碌卡極之普遍，但出名牙擦嘅冠軍級練馬師「食力簡」簡炳墀就鍾意做「cash king」。
尋日喺馬場遇到食力簡，佢自爆近年愛歎世界，除迷上高球，閒閒哋打到九十幾桿外，行街使錢絕不手軟。為證明「食力」，佢二話不說喺褲袋抽咗一疊足有三吋幾厚嘅金牛出嚟，記者估計至少有十萬八萬。孭住咁多金牛出街，唔驚畀人打劫咩？食力簡晒命話：「我買嘢鍾意畀現金，不過AE黑卡我都有張。」
雖然食力簡荷包脹卜卜，但政府畀長者嘅優惠，佢都唔會錯過。佢順便晒埋身上嗰張長者八達通卡，話泊車時用佢「嘟一嘟」方便好多喎！
