早前立法會組團訪問東歐三國，旅遊界議員阿Paul謝偉俊要求同行嘅議員棄坐商務客位曾掀起爭議，近日佢又入紙向政府提出書面質詢，要求當局正式澄清，高官、公營機構僱員同議員外訪坐飛機賺到嘅飛行哩數，係咪屬於公共財產？係咪應該收歸國有？
政府官員同公營機構僱員，現時已有規定公幹賺到嘅飛行哩數須全數上繳，機票獎賞留番下次公幹用，而區議會又甚少長途考察，所以阿Paul呢條質詢，首當其衝嘅肯定係立法會議員。依家議員使用飛行哩數換機票，並冇明文列明得定唔得，唔少議員多年嚟都「物盡其用」，換機票自用，就以東歐三國團為例，估計積分足以換取一張香港飛台北機票。
阿Paul提出嘅質詢即係有意叫班同僚嘔番啲飛行哩數出嚟，咪自己落袋。但有議員私下批評阿Paul搞搞震，有人仲作出反擊，指阿Paul早前參加東歐團時，「佢自己都有換取飛行哩數啦！」
身在海外嘅阿Paul回覆時否認「換機票」指控，但一時間唔肯定助理有冇幫佢搞，佢強調議員有冇以飛行哩數換機票唔係佢條質詢嘅重點，佢係希望政府檢討統一處理呢筆「公共財產」，非針對同僚。