本港男女比例日漸失衡，令社會出現大量「剩男剩女」，雲英未嫁嘅立法會議員Tanya陳淑莊早幾日喺網誌度就提議喺facebook成立組群，為未婚男女提供邂逅嘅平台，但加入組群嘅首要條件係要做過三次或以上伴郎伴娘嘅男女。咁咪變相搞網上相睇？
Tanya忽發奇想，係因為有次同黨友傾開婚姻時，二人不約而同提起一個都市傳說，就係做過三次伴娘嘅女士會嫁唔出，佢黨友仲言之鑿鑿講到呢個「魔咒」男女通用，因為佢當年結婚擔任伴郎嘅朋友，唔知係咪因為做過三次伴郎，所以到依家都未結婚。Tanya即時笑言：「哈！我都做過四次伴娘。」
之後佢就靈機一觸，諗到喺facebook開一個伴郎伴娘小組，用意係撮合做過三次以上伴郎伴娘嘅「孤男」同「寡女」。佢仲教路，話男女雙方要抱住一個進取嘅態度，擴闊生活圈子，至有望打破「三次不婚」嘅魔咒喎！