鬍鬚曾話自從豁免咗葡萄酒稅後，葡萄酒貿易已催生咗大量商機，形勢令人「飲得杯落」，仲話：「放棄每年五億六千萬稅款是值得的，因為賺回的經濟效益同就業機會嘅價值遠遠超過這個數目。」不過，心水清嘅市民都會記得，鬍鬚曾唔係減酒稅嘅先驅者，因為佢嘅前手喺○七年已宣布將葡萄酒稅率大幅減至百分之四十，當時政策推出第一年，紅酒嘅入口量已增加一點二倍，全年銷量亦增加大概三成。

換言之，鬍鬚曾嘅減稅措施，其實只係拾人牙慧，照辦煮碗減埋剩低嗰啲酒稅，但竟然講到自己係葡萄酒大收旺場嘅功臣，咁除咗證明佢面皮幾尺厚外，仲凸顯政府可以攞出嚟炫耀嘅政策實在少得可憐，所以啲高官先會爭住邀功嚟叨光谷民望。

大想頭 不甘超英趕美

為彰顯個人「功績」，鬍鬚曾愈講愈大，引述業界估計香港今年就會超越倫敦，成為全球第二嘅葡萄酒拍賣中心，排名僅次於紐約。然而，鬍鬚曾竟不甘於「超英趕美」，仲大想頭到話：「我們的理想不限於此。我們的目標，是把香港發展成區內葡萄酒的貿易和集散中心。」

猶記得老董當年就提出「超英趕美」嘅目標，跟住前財爺阿松仲話將香港打造成亞洲曼哈頓。結果點吖？最後全部唔見影。

鬍鬚曾最後話自己唔會貪酒，但佢呢番高大空嘅言論就好似「飲大咗」咁猛咁吹噓。佢仲話近日同內地海關達成協議，為香港進口內地嘅葡萄酒提供清關便利，預告遲啲會公布詳情，十足十喺度耍醉拳咁懶勁，因住又係雷聲大，雨點小，到時又衰一鑊呀！