勞工團體狂炳政府縮減資源,令護理院舍人手短缺,導致長者得唔到良好照顧,生活冇晒尊嚴。有關團體今年頭十個月就接獲超過八十宗涉人手短缺引發嘅投訴個案,比去年上升二成三。
唔講唔知道,一講嚇一驚。原來好多安老院實行非人性化服務,好似工廠處理貨物咁對待長者。有啲活動自如嘅長者被迫着約束衣,郁吓都唔得;有啲老人家明明大小便正常,但卻要被迫兜尿片。而講到派錯藥,更加係家常便飯。
為人子女,孝敬父母天經地義,但係香港好多打工仔要為兩餐奔波,冇時間照顧老人家,惟有送佢哋入護理院舍,以為起碼有人照顧三餐一宿,可以安享晚年,點諗到老人家被糟質成咁呢!
叮,講嚟講去,都係資源不足累事。唔少由政府資助嘅安老院舍人手緊絀,本來私營安老院合適人手比例係一比三,但實際上現時院舍人手比例竟然介乎一比二十至一比四十,夜更甚至一比六十。長者沖涼、着衫、換尿片、臥床轉身都要人幫,護理員仲要負責驗血糖、清潔、洗眼等唔屬於職責範圍嘅工作,忙到氹氹轉,有乜法子唔出事吖。
好似觀塘有間院舍咁,夜更只有兩個護理員當值,卻要來回六層樓照顧三百幾名長者,就算有三頭六臂都搞唔掂喇。呢間院舍曾試過護理員向長者派藥後以為佢瞓着咗,過咗八九個鐘先至發覺佢已經過咗身。
話時話,護理院舍人手短缺、七國咁亂,政府唔通一啲都唔知?嗰班高官見到啲公公婆婆喺院舍過咁嘅生活,唔通一啲同情心都冇?
唔知係假,詐傻扮懵係真。過去十年,全港護理、護養宿位差唔多增加一倍,但係政府資源冇按需要增加,亦冇增加人手,工作量愈來愈大,服務質素唔下降至奇。一句講到尾,就係政府諗縮數,令院舍員工捱到殘,公公婆婆受盡折磨。
不過,咁都未算慘,好多老人家等到死都未能入住安老院,先至夠淒涼。勞工及福利局局長張建宗親口承認,去年共有二千五百幾名長者喺輪候期間過身。真係聞者心酸!
唔通政府真係無錢幫助長者?梗係唔係喇,紀律部隊一扭計,當局即刻為佢哋加薪,每年大拿拿額外支出八億幾,可見政府唔係無錢,而係無良!