詩姐早前喺中環太子大廈商場嘅丹麥百年名牌首飾Georg Jensen店內左睇右睇，仲睇到托晒腮，嘴角溢出笑意，揀咗十幾分鐘後，詩姐攞住一個精美盒仔笑住離去，我哋上前八吓佢買乜，佢話本來係攞個心口針嚟維修，咁啱睇中咗對銀耳環啫，但就唔肯講價錢同款式。佢雖然唔想講，但店內啲耳環絕對唔平，乸埋都要五千幾蚊，大家第日望到詩姐戴銀耳環就心照啦。

講開詩姐嘅行頭，佢前日悉心打扮為獅子會午餐會演講，戴住個紅珊瑚製嘅傳統童子造型襟針，頸喉位就掛上花形紅珊瑚，同襟針相映成趣；手上戴嘅就係銀色瑞士Patek Philippe（百達翡麗）名錶。呢個紅珊瑚襟針好特別，據講七十年代購自台灣，家吓保育風盛，已屬有錢都買唔到嘅貨。