城中名校男拔萃今年迎來一百四十周年校慶，校方搞咗連串大型慶祝活動，尋日就有個露天音樂會喺學校草地舉行，可以話係百幾年嚟第一次，連六五年畢業嘅校友林子祥都返咗去表演，仲同班師弟夾Band夾得好開心添！
講起學校生涯，阿Lam披露同現任男拔萃校長張灼祥係同班同學，兩個人多年嚟都唔熟，直至近年打高爾夫球先發現彼此都叫阿祥、留鬚，性格又係咁怕羞，仲有過一桿入洞嘅紀錄。
阿Lam獻唱，現場觀賞者梗係聽出耳油啦，睇真啲，原來前環境運輸及工務局局長廖秀冬都在場，佢嘅二公子蕭偉中（Justin）九五年喺男拔萃畢業，尋日都有返母校同阿Lam一齊夾Band。細細個有讀寫困難嘅Justin，全靠冬姑循循善誘，至克服到呢嗰障礙，依家成為成功音樂人，呢份母子情深感動到好多人。
不過，Justin話成日都唔知媽咪去咗邊，只知道佢成日往返大陸、美國做義工，佢仲好體諒咁話，希望媽咪有自己空間，所以至唔特別追問。