金融管理局前總裁任志剛已經卸任一個半月，呢個忙人hea咗個零月之後，尋日喺上海作退休後首次公開演講，應復旦大學邀請向一班工商管理碩士生剖析內地金融體系面對嘅新挑戰。佢事後話自己好願意同學生溝通多啲，亦願意為國家同香港貢獻自己嘅金融知識，似乎抖咗一輪後，任總已經靜極思動，開晒綠燈任人請噃。
任總尋日嘅演講分析全面，見解精闢，雖然退咗休，但依然密切掌握內地金融發展，佢仲喺結語時話，退休後對學習點樣hea（悠閒）住過日子苦無寸進，反而喺保持對貨幣同金融嘅個人興趣，則游刃有餘。不過，被問到佢出任中國人民銀行顧問嘅傳聞，任總就有啲感慨咁話：「呢個可能係我嘅一廂情願啦！」
呢句話相當可圈可點，到底弦外之音係乜，每個人嘅解讀都唔同，不過，任總連復旦大學嘅演講都肯千里迢迢咁撲去，又開到聲話願意同學生多啲接觸，似乎佢好想將自己嘅金融專才用於國家同教育之上，有心人快啲行動啦！