銷聲匿迹咗一段時間嘅前政務司司長陳方安生，尋日又不甘寂寞走出嚟噏嘢，暗踩佢嘅細佬煲呔曾，話公務員喺政府愈做愈冇癮，令唔少公認有質素嘅政務官跳船過檔半官方機構；佢又叫煲呔曾如果面對外界批評一樣瞓得好，就必須對家人、同事都有忠誠。真係句句有骨，腰心腰肺！不過，民主阿婆從來有口話人，冇口話自己，講到同佢有莫大關連嘅一九九八年赤鱲角新機場啟用大混亂醜聞，就隻字不提嘞！
心水清嘅人都知道，近年每逢同民主派有大嘢搞，民主阿婆都會出嚟噏三噏四博曝光。民主阿婆尋日走到東涌出席一個頒獎禮做演講嘉賓，佢致辭時一開始就自爆，呢次係佢第一次嚟到東涌嘅學校，仲懶自豪咁話東涌係佢嘅「Baby」，因為東涌都係十幾年前隨住興建新機場而發展出嚟。對在場唔少都係十幾歲嘅中學生嚟講，未必會知道，新機場喺九八年啟用初期出現大混亂，佢責無旁貸，可惜民主阿婆對呢段歷史隻字不提。
民主阿婆更乘機暗踩煲呔曾，記得月初煲呔曾喺商界聯合午餐會上，表示面對外界批評，每晚仲瞓得好好，民主阿婆就話無論做咩都好，做人要接受挑戰，有需要時唔好怕表達意見；如果想夜晚瞓得好，就必須對家人、同事都有忠誠。真係一句就腰中煲呔曾死穴！話時話，民主阿婆以前同煲呔曾情同姊弟，依家就真係反轉豬肚囉！