周一鑊尋日喺電台節目推介呢個疫苗接種計劃時，雖然表現得好小心，但市民葉先生嘅提問就中晒要害，佢話既然大家都好擔心豬流感，咁政府會唔會加多一類高危人士，連政府高官、特首、局長都要打呢？話晒班高官對香港人咁重要，冇咗佢哋邊個領導香港呀？

呢個問題可以測試啲高官對疫苗接種計劃有幾多信心，周一鑊雖然好大體咁回答：「我哋（問責司局長）覺得自己唔應該有特權用呢啲政府資源先。」但潛台詞係高官唔使打。

年過六十五屬高危人士

至於煲呔曾呢？周一鑊慢條斯理咁答道：「我相信佢都可能係高危人士，因為佢啱啱過咗六十五歲生日。其他官員當然睇佢自己意願啦！」即係話，煲呔曾屬於政府規定要打豬流感疫苗嘅高危人士，按理佢應該要打針。照咁睇，呢次嘅疫苗注射計劃，煲呔曾係唯一可以做周一鑊白老鼠嘅政府高（齡）官！

疫苗注射計劃都未開始，周一鑊已經搞到衞生署要停止中二至中七學生嘅一年一度體檢計劃，嚟緊又有其他學童同基層健康服務受影響，衞生方面咁多問題，到疫苗注射時，會唔會又搞到一鑊泡呢？