小白觀點

學習藏獒精神明益佢

中學女教師唔滿意有幾個學生遲咗上堂，缺點都費事記，即刻就地正法，要求學生哥扮狗仔hand hand。

唉，不過又唔怪得呢位女教師㗎喎，你知啦，以前啲先生就話可以用嗰塊一吋厚嘅大木尺打手板啫，之不過塊嘢已湮沒多年，可以向聯合國申請為「人類物質文化遺產」，所以呢位教師至迫不得已，要改用一套叫學生扮狗嘅非物質精神懲罰。

教曉學生乜嘢叫藏獒精神，學懂忠誠堅毅，真係明益佢哋咋，日後到佢哋畢業踏入社會，諗起披頭四首歌嘅歌詞：「I've been working like a dog」，自然就會明白老師嘅一片苦心o架喇。

網友觀點...X）...

[　佚名　]：遲咗返嚟上堂要扮狗仔？！咁好似我呢啲，年中要扮幾多次呀？！

[　黃太太　]：嘩，乜依家啲教師咁恐怖嘅，當啲學生唔係人，當佢哋玩具咁玩。

[　Patrick　]：哼，淨係扮狗仔畀hand hand咪算仁慈囉，老師都未叫佢哋扮狗仔畀佢當櫈坐，未short得晒。

[　風聲　]：聽講好多教師都做到精神有問題，特別係做咗十幾年嗰啲，政府成日轉制，唔short就有鬼啦！

阿豪觀點

寵物非發洩壓力工具

有個非常女教師，為咗罰遲返課室上堂嘅學生，竟然罰班學生扮狗，侮辱人唔使本！

其實呢個非常女教師都算好好彩o架喇，遇到班咁乖咁聽話嘅學生。如果豪伯係其中一個被要求扮狗嘅學生，可能會做一隻失常嘅鬥牛p，又或者係一隻學極都唔識喺指定地方口殊口殊嘅puppy……嗰個女教師又係嘅，有咁多動物唔叫學生扮，係都叫人扮狗，扮吓兔仔呀、金魚呀唔得咩？再唔係叫學生扮植物，好似仙人掌咁都幾盞鬼吖！

不過個女教師最大問題唔係得罪學生，而係對動物唔好！唔係咩，喺佢心目中，寵物係用嚟發洩自己壓力嘅工具，呢一點先至最教壞細路呀！

網友觀點...X）...

[　匿名　]：如果畀我係個學生，死都唔會扮，除非個miss一齊扮狗！

[　Lillian　]：個老師咁鍾意開呢啲玩笑，罰番佢扮豬囉~

[　小露寶gogo　]：個老師仲細咩，咁嘅玩笑都開得？佢係咪睇監獄風雲入晒腦，以為自己係大佬，要人做乜就做乜？

[　森美狗　]：叫人扮狗嗰個蠢，扮嗰班人仲蠢，點解老師叫你做乜就做乜？班學生自己冇思想㗎咩？適當時候應該反抗吖嘛！

網址：www.lukchiho.blogspot.com