老董當年嗰句「留下來需要更大勇氣」，好似講緊依家咁。風大雨大，坐住條周圍漏水嘅爛船，一定沉硬，走得快好世界。最近就陸續有政務官劈炮唔撈，出去搵真銀。

旅遊事務專員方舜文啱啱證實，將跳槽貿發局做副總裁。上個月有民政事務局副秘書長蘇錦成請辭，轉職申訴專員公署；之前先後有房屋署前副署長李達志離開政府去金管局做；運輸及房屋局前首席助理秘書長林植廷亦轉職生產力促進局。個個搵到筍工就拜拜，睇咁嘅勢，高官跳船陸續有來。

方舜文仕途一帆風順，紮職都快過人，同期入職嘅政務官只有佢升到首長級第六級，好有機會更上一層樓做常秘添。政壇明日之星放棄仕途，到底為乜？除咗外面薪酬待遇更吸引之外，最緊要嘅，睇怕係想快快離開港府呢條風雨飄搖隨時反艇嘅爛船。

話時話，家陣嘅政務官仲邊有佢哋啲前輩咁風光吖。問責制搞到唔湯唔水，當局無端端一年使幾千萬公帑，搵班副局長同政治助理返嚟阻住地球轉，大權旁落不特止，就算升到盡做個常秘，一樣要受呢班政治新貴嘅氣，上到立法會仲要隨時畀議員篤口篤鼻鬧。

與其捱落去，不如早走早着。正如城市大學專業進修學院學術統籌宋立功話齋，高官接連求去，會令原本政務官已經青黃不接嘅問題更加惡化。有本事、有潛質嘅政務官買少見少，留低嘅繼續望天打卦，渾渾噩噩，你話港府施政有乜理由唔愈做愈差？香港有乜辦法唔愈來愈亂？

叮！查實拋棄港府嘅又點止呢班天子門生，行政會議嘅「內閣成員」咪一樣唔畀面政府，公開打對台。行會成員張炳良同鄭耀棠早排分別企出來，一個主張復建居屋，另一個支持恢復定期賣地，佢哋嘅言論明顯同政府現行房屋同土地政策唱反調，當集體負責制透明。連最高決策班子都成日內訌，叫市民聽邊個先？

政府畀人拋棄，煲呔曾眾叛親離，話到尾都係自己攞嚟啫。煲呔曾其身不正，「益親家」、「救弟媳」呢啲懷疑涉及利益衝突嘅醜聞，爆完一單又一單。佢死唔認錯不特止，仲大鬧傳媒「無中生有」，民望卒之跌到阿媽都唔認得。

港大最新民意調查顯示，市民對港府嘅信任程度急跌，煲呔曾爆出醜聞之後，話唔相信政府嘅，暴升咗十四個百分點；相信政府嘅唔到一半。畀煲呔曾佗衰晒，政府有乜辦法唔弱勢？公僕士氣有乜辦法唔低落？高官又有乜辦法唔個個爭住跳船吖？叮！