勞工及福利局政治助理Zandra莫宜端尋日出席長者活動時講起環保問題，講到自己好似環保人辦咁。Zandra話佢屋企好節約用水，十五個月大嘅囝囝沖完涼嘅番梘水會用嚟洗衫，又畀囝囝着可清洗嘅環保尿褲，取代舊式即棄尿片。

唔單止咁，佢仲進行「戒片計劃」，話依家已經開始要囝囝戒尿片，訓練佢要出聲去廁所，但係囝囝都仲未學識，囝囝年紀仲細，真係急都急唔嚟。咁梗係啦！正如膠袋咁，大人都未必話唔用就唔用，何況係BB？

對於有調查話市民對副局長同政治助理嘅認知度勁低，Zandra指政助嘅職能係負責政治聯繫，唔應該咁短視為曝光率，否則就唔係好務實。出席同一場合嘅環境局政助蔡少綿亦話唔會刻意谷人氣，先做好依家嘅工作。

咦！班政助係咪終於開竅呢？似乎識得軟sell自己，兼且識幫政府補吓妝喎！