據悉，富貴黨將派二十至三十人參選區議員，除約二十人競逐連任外，其他主力進攻新區，貪嗰啲地方各個政黨都係由零開始，對地區脈絡薄弱嘅富貴黨嚟講相對易打。由於區選係二○一二年立法會選舉嘅前哨戰，黨內個別核心會視乎各區嘅樁腳實力，決定立法會選區，所以區會一戰不容有失。

一名富貴黨高層仲斬釘截鐵咁話唔會做損人不利己嘅事，如果研究過勝算唔高，佢哋唔會同建仔或工聯會爭位，但如果有得博，就唔會將機會拱手相讓。呢位高層仲提咗個相當創新嘅建議，就係委託可信機構做選區民調，如果某個選區大家爭持不下，就由民調決勝負，輸者無怨，咁樣建制派就唔使次次都為選舉起晒槓嘞。

建仔同工聯會嘅核人聽完呢個建議後，初步反應正面，都話唔係冇得諗。之不過，理論同實踐往往係兩回事，民主派以前都試過為區選做民調，但由於每個選區隨時得兩、三幢樓，地域咁細，做民調難度極高，就算民調有咗結果，各黨派隨時都會反口。所以，就算建制派真係有心做，要搞得成都唔容易。