擴大問責制請嗰隊「八國聯軍」副局長同政治助理，上任逾年劣評如潮，但煲呔曾喺上個月再委任一個前公務員同一個現任公務員出任副局長，完全違反擴大問責制時「於各界別吸納人才」嘅原意；尋日又再自打嘴巴，公然違反委任公職人士嘅「六六原則」，將「六六原則」變咗「六六無窮原則」。

早年政府委任社會人士出任公職安排混亂，好多人變咗「公職王」，一人身兼十個八個公職，搞到佢哋分身不暇，有時因為公職過多而影響表現。畀人鬧爆後，政府喺○二年提出要求各個部門嚴格執行同一人「不能擔任同一公職工作超過六年」及「不能同時出任超過六個公職」嘅「六六原則」，確保各委員會同公營機構運作順利。

錢果豐喺○三年七月接替蘇澤光做前地鐵主席，期間帶領兩鐵合併，再接任港鐵主席一職，任期至今年十二月。兩次委任本身已令錢果豐嘅任期超過六年，點知政府尋日變本加厲，再委任錢果豐做多三年去到二○一二年十二月三十一號，任期足足有成九年半，比規定嘅多咗三年半。唔知政府係咪當兩鐵合併咗做港鐵後，啲任期可以重新計過呢？係嘅話似乎茅啲喎！

巧言掩飾用人唯親

究竟係咪人才缺得咁緊要，非佢莫屬？委任完三年、三年，又三年，再係咁落去，錢果豐咪可以做港鐵「皇帝」做到天荒地老？其實政府打破「六六原則」嘅事例早有前科，以「需要富經驗之才」為名，貫徹「用人唯親」之實。對上嗰次就喺今年七月破格委任第七個公職畀「公職王」鄭慕智，最後鄭慕智拿拿臨辭一個公職至扯番平。

市民有眼睇亦識計數，呢次再委任錢果豐，肯定違反六六原則，政府咪以為可以瞞天過海先得o架！