小白觀點：食署蟲鼠組殺入潮界

科技日新月異，潮人冇番部iPhone喺手，點出嚟見人呀？不過聽聞家陣有條iPhone蟲蟲好毒，中咗招雖然未至於死機，但就會彈個Rick Astley大頭出嚟，咁已經夠難搞啦。試諗諗，有日當你唔理會全球暖化問題，着住一身皮衫皮褲喺酒吧用iPhone搖骰溝女嘅時候，竟然搖咗個鬼佬蔡楓華出嚟，真係娘到爆呀！

但呢個世界有危就有機，iPhone蟲蟲肆虐，可見新興嘅高科技杜蟲行業有得搞，不如由食環署防治蟲鼠組擔大旗，同大學機構合力鑽研一種叫「iPhone鷓鴣菜」嘅杜蟲藥，手機唔理生積定有蛔蟲，用咗之後，Rick Astley冇晒，自信即刻返晒嚟，得咗！

網友觀點......

Ray

haa，條蟲幾cute吖，如果轉周秀娜出嚟就更加very good嘞！

阿明

iPhone首次出蟲喎，好似唔太毒，我都想中吓。

Terence

有咗第一次，梗會陸續有嚟啦，咁容易就有蟲蟲，iPhone回水！

iPhone Fans

天下間有蟲就要滅蟲，放心啦，遲啲周街實有掛牌iPhone滅蟲專家。

網址：www.sunsiupak.blogspot.com

阿豪觀點：英國蔡燶華未算最毒

專門針對破解版iPhone嘅蠕蟲依家傳得好勁，中毒嘅iPhone張wallpaper會自動變成英國過氣歌手Rick Astley個樣。

該煨囉，Rick Astley個地位約略同我哋香港「四大癲王」之一嘅蔡燶華同級，就算毒唔死部iPhone，都娘死個iPhone主人啦，陰功！

不過有一點好得意喎，條蠕蟲除咗將iPhone張wallpaper自動轉為Rick Astley個樣之外，又真係好似唔見對部機有咩特別傷害喎，可想而知一個人嘅樣可以有好大殺傷力。

哎吔，你話如果呢種病毒傳到嚟香港，仲出現變種，wallpaper個樣由Rick Astley轉為煲呔曾，咁你話係咪仲大鑊先？

網友觀點......

卜勤

iPhone生蟲，蘋果又出過部新，實大把人爭住買。大家買iPhone時純過白雪公主，中晒蘋果毒。

匿名

我睇新聞話只會改wallpaper，唔會有其他影響，唔知真定假。

無厘頭

其實iPhone咪即係一部手提電腦，咁中毒又一啲都唔奇怪喎！

鬼仔

其實Rick Astley喺80年代好紅，有啲歌唱到街知巷聞，不過依家冇人記得佢lu……

網址：www.lukchiho.blogspot.com