的士佬甲：老兄，做乜咁好唱口？

的士佬乙：好咩呀，我話一日不如一日就真，家陣日日搵得雞碎咁多，啲高官管唔到啲八折黨，又無膽畀你自由議價，於是整個九唔搭八嘅短加長減出嚟。頂，結果短加長減推出半年，我哋啲收入仲少咗喎，你話吹唔吹脹？

的士佬甲：計我話，啲高官幫唔到忙都算啦，最怕佢添煩添亂！呢，嗰個環境局仲喺度搞緊個停車熄匙，要你大熱天時熄埋個冷氣焗桑拿。咁都未算，早排有個行家畀差佬捉咗去做人肉路障擋飛車，差啲連命都無呀！係呢老兄，乜你唔肚餓咩，食個包就夠嗱？

的士佬乙：鬼咩，窮呀，運輸署無端端又話要換的士司機證，無端端又要畀幾十蚊喎！

原來，運輸署上周五忽然公布，由即日起至明年三月，所有的士司機必須更換全新設計嘅的士司機證，違者會被罰款二千蚊。運輸署話喎，換證係為咗提升司機嘅服務質素同專業形象。

到底張新證有幾把炮呢？太一叮左睇右睇，不外乎改改隻底色，張相由靠左變成靠右，再加咗個證件號碼咁，根本就大同小異。而更加莫名其妙嘅係，家陣張第二代證件係○二年發嘅，比第一代大咗成倍，目的係畀啲乘客睇清楚司機資料，但係運輸署張第三代新證竟然又比第二代細張，到底點樣「提升服務質素同專業形象」，太一叮抓爆頭都諗唔到。

難怪啲的士司機批評，張證咁新又要換過，簡直係勞民傷財。於是乎，佢哋不斷向運輸署追問換證原因，但對方死都唔答。亦即係話，對於換證呢單嘢，唔止太一叮同的士司機唔明，就連運輸署都好可能唔知自己做乜。計太一叮話齋，應該換證嘅其實唔係的士司機，而係運輸署署長黎以德，大家應該頒佢一張大大張嘅「阿茂整餅證」，冇嗰樣整嗰樣吖嘛！

而更加九唔搭八嘅係，以前的士司機做證換證由運輸署負責，但係今次就拉埋啲工會同商戶落水。有的士工會反映，原來運輸署只係負責印張證出嚟，但係影相、印相同過膠程序就由佢哋負責，結果運輸署一聲換證，工會就要安排人手資源，做足幾個月，但係署方就完全無資助。

除咗的士工會之外，運輸署仲叫埋駕駛學校、加氣站、車行、沖印中心等等幫手，而成本就由司機負責，每張收十蚊至一百蚊不等。除咗亂同嘥錢外，更大嘅問題就係私隱，有的士司機擔心由唔同機構負責換證，對方攞咗資料去做乜都得。太一叮思疑，黎以德連換證咁大件事都可以假手於人，大家都好應該頒張「卸責證」畀佢喎！

叮！你個黎以德吖！家陣的士司機搵食已經夠艱難啦，你身居高薪要職，唔去諗計幫啲司機改善收入，反而無事生非、擾民添亂，搞個不知所謂嘅新證出嚟。嚟嚟嚟，等太一叮再頒張「腦殘證」過你，返去掛喺牆度，面壁思過啦你，叮！