外號「青樓名妓」嘅張永霖尋日去樹仁大學新聞系演講，主講題目係「教育工作同社會責任」，佢以自己為人辦，奉勸學生投資勿玩股票，因為自己喺金融界打滾四十年，結果都係得個吉！佢話，千祈咪以為投資市場可以改善生活，因為呢個市場係有錢人嘅玩意，唔止啲大鱷會興波作浪，連政府都喺度上下其手。但香港樓價以升軌為主調，當樓價調整至啱水位，不妨入市當投資，當然，依家樓價高到離譜，梗唔係適當時候啦。

難怪近年佢每次推介投資都係嗌人買磚頭，或者示範藝術品升值之道，對股票真係懼而遠之，似乎令佢最覺悔不當初嘅，並非當初誤墮紅塵嘅商界迎送生涯，反而係表面風光嘅金融界戰績。

講完股海辛酸之後，佢又話自己對從政愈嚟愈冇興趣。咁曾經幾時有過興趣呢？佢即刻兜番，強調一向都冇興趣，而且愈嚟愈冇興趣。