本港創出世界最貴豪宅價之後，連城中名人都話買唔起，或者係得恒基主席「四叔」李兆基口中嘅內地人至有本事，令唔少港人心有戚戚然。合和實業主席「哥頓」胡應湘本身係地產界中人，佢都話香港豪宅價太貴，政府應該壓抑！
促協助市民「上車」
哥頓尋日去香港會食晏，問佢支唔支持復建居屋？向來直腸直肚嘅哥頓話要研究吓，暫時唔評論。不過，佢就提醒政府要做兩項重要工作，一係壓抑豪宅樓價，唔好再放任豪宅價格飆升，升得太高會形成泡沫；其次係透過政策協助市民「上車」首次置業。佢仲話，呢啲建議並非高難度，最緊要係有冇心去做啫。
