本港幾間大學今明兩年都有人事變動，最近浸會大學遴選咗下一任校長，現任校長吳清輝做到出年六月底就正式退休，離開工作咗二十幾年嘅浸大。退休在即應該係好開心嘅事吖，不過吳校長尋日卻話，擔心退休之後無處容身，因為佢冇屋住喎。
點解咁淒涼？原來佢喺浸會一做二十幾年，一直住喺浸會提供嘅宿舍，既冇置業，亦冇其他居所，退休後就要搬出浸大嘅宿舍，點算呢﹖佢本來打算退休後先考慮置業，點知撞啱樓市狂熱，豪宅創出天價，普通樓都好貴，想搵間退休大屋真係難過登天。
堂堂大學校長工作二十幾年都話買唔起樓，真係唔知乜嘢人有本事家吓置業囉。