金價屢創新高，好多人都唔敢入貨，不過，一向有儲金習慣嘅專業會議立法會議員梁美芬就冇有怕，近日仲密密買金，家吓每両金價衝破萬一蚊，佢嘅金庫藏品都升值咗三、四倍，難怪佢話對黃金情有獨鍾啦！
梁美芬早兩日先去咗中環一間金舖，當日佢身披一件黃色中褸喺金舖入面同門口行嚟行去、左揀右揀，差唔多成個鐘先埋單攞住袋金走人。我哋問佢有乜收穫，先知原來佢係為年尾出嫁嘅契女買首飾，仲應承開放小金庫畀我哋見識吓。
佢嘅小金庫有好多珍藏，金幣、金錢、金錠同金條通通都有，佢話：「我太爺、爺爺鍾意儲銀，佢留咗好多錢幣、銀器畀我哋。」就係咁，梁美芬都開始儲金，第一份糧買咗隻鑽石戒指送畀媽咪之後，剩番嘅錢就用嚟買佢人生第一個楓葉金幣，之後每個月出糧都會買一個金幣當儲錢。