施政報告發表當日、即係立法會復會後首天，據聞建制派就召開咗第二次富貴飯盒會，當日由梁劉柔芬掏腰包，事前佢更以主人家姿態落力Call議員出席，雖則話大家同意輪流科水啫，不過建仔做完第一次東，接力嘅唔係「大搞手」詹培忠、五散人林大輝、專業會議石禮謙或者中總代表黃宜弘，而係新組織經濟動力，呢個安排可堪玩味。

餐飯之後兩日，經濟動力神神秘秘咁邀約個別獨立議員見面，但五散人另有他約冇出席，由於人少，據講當日嘅神秘約會亦取消咗。食一次檸檬唔緊要，問題係經濟動力要躋身保皇第一勢力，實在好睇佢哋有幾多策動能力喇。