28/10/2009

播放本新聞相關短片

政情:肥平讚車公籤文好靈

近來政壇多事,煲呔曾冇開誠布公,反而肆意發難話外間嘅質疑係「無中生有」,前民政事務局局長何志平尋日出席一個場合時,都忍唔住話:「車公廟支下籤真係好靈!」

我哋日前先話過,今年年初車公廟籤文中有一句「禍去禍來因自招」,講中晒煲呔曾為一己私欲引發連串利益輸送風波。肥平尋日出席一個基金會成立活動時,我哋問佢作為前高官,點睇慳電膽風波搞到民怨沸騰,肥平笑騎騎咁拍拍記者膊頭話:「車公支下籤真係好靈!」睇嚟肥平都對籤文心領神會噃。

講番佢自己,肥平透露啱啱去希臘出席完一個名為「國際文明對話」嘅會議,與會嘉賓包括德國前總統,肥平喺會上大談中國未來發展要重視道德教育,要以德服人。雖然外國人聽得麻麻哋明,但肥平唔介意嘥口水講到對方明為止。