行政會議成員「金刀梁」梁智鴻尋日話，行政會議一向有兩條規則，一係集體負責制，二係保密制，各成員必須遵守上述原則。佢只係背誦規條，冇祭出家法，違反規矩嘅曳同學有冇聽出弦外之音呢？

房屋資訊大混亂

其實樓市亂局嘅起源都係煲呔曾，佢喺施政報告記者會上話天價豪宅唔影響一般市民居住嘅樓宇，令到豪宅市場好似火上加油咁。冇殼一族大表不滿後，行會成員張炳良遂提出復建居屋嘅意見，佢哋各有各講都未算，鄭汝樺又上陣，以一句「居屋唔係干預樓市嘅政策」嚟反擊張炳良。佢哋各有身份，結果搞到房屋訊息更加混亂。

行會成員同政府公然對着幹好唔健康，今年以嚟呢種情況更多次發生，先有梁振英，後有鄭耀棠，日前行會前成員田北俊就左右開弓，既批評部分現任行會成員同政府唱反調，又批評政府太弱勢，冇嚴肅整頓行會，行會冇紀律又進一步削弱管治威信。

年屆七十歲嘅金刀梁係行會成員嘅老大哥，佢尋日好謹慎咁話，行政會議成員必須遵守兩條既定規則，至於違規人士使唔使辭職，佢就唔願多講。金刀梁雖然講得客氣，但佢煞有介事咁背誦家法，態度都好鮮明啦，唔好忘記金刀梁條腰骨好硬㗎！

日前佢以安老事務委員會主席身份出席活動時，被安排做一項「坐地前伸」嘅活動測試腰骨柔韌度，結果發現佢條腰骨好硬，同金刀梁傾起件事，佢一臉猶有餘悸咁話：「一早就知道要做呢項檢查一定唔掂，七十幾歲人喇，想我點吖！」