正常六合彩因為極之難中，所以冇人蠢到瞓身落注，地下六合彩因為相對嚟講真係比較易中，所以有病態賭徒賭到家散人亡。換言之，地下莊家係吸血害人精。

由於賭風熾熱，地下六合彩又衍生另一種助紂為虐嘅黑心行業，就係印製所謂提供必贏貼士嘅六合彩報。如果你喺內地印製，你可能會好大鑊，因為公安有權拉人封舖，罰錢不特止，話唔定仲要洗乾淨八月十五踎監。於是乎，有部分自命聰明絕頂嘅奸商就諗出一條計仔，不如喺香港合法印六合彩報啦，然後由不法分子走私運上內地大賣特賣，即使偷運失敗斷到正，罪名都輕得多。前一排之嘛，本港警方喺屯門對出海面搗破大批港產六合彩報由水路走私至內地。

邊個有份印六合彩報呢？其中一個就係臭名遠播嘅黎智英！

有三份港產六合彩報叫做《創富》、《六合皇》同埋《貼士皇》，承印嘅係超企印刷及傳訊有限公司，呢間公司其中一個董事就係人稱淫賤黎嘅黎智英嘞。至於其他董事咯喎，唔係壹傳媒要員，就係《蘋果日報》主席。換句話嚟講，承印害人六合彩報嘅有關人等，基本上就係淫賤黎集團。

呢嗱嗱嗱，問你服未？淫賤黎一方面誨淫誨盜，一方面反中亂港，家陣仲做埋「六合彩報大旗手」，幫助地下莊家榨取病態賭徒嘅養家活命錢，原來一個人真係可以將自己個良心掟落馬桶一嘢沖走o架！

係人都知，沉迷賭博等於倒錢落海，印六合彩報助長賭禍已經係奸過奸人堅嘅行為，仲要畀人走私偷運去內地荼毒同胞，更加係罪無可恕。有一樣嘢大家唔好唔記得，用電腦攪珠嘅六合彩號碼有乜可能會有貼士o架？六合彩報唔止助長賭禍咁簡單，根本就係存心欺騙。

諗諗下，唔對路，喂，淨係貪污已經可以亡國，如果上有貪官污吏包庇地下六合彩，下有病態賭徒傾盡全力倒錢落海，即係貪污舞弊加上爛賭，亡國更加易如反掌，唔通內地當局仲可以視若無睹！

點解話有人包庇呢？唉，內地地下六合彩存在咗好多年o架啦，執法部門捉來捉去都係蝦毛蟹將，始終未見揪出幕後黑手，你話冇人包庇梗係冇人信啦！