本文重點
煲呔曾以高薪請班「八國聯軍」副局長返嚟，原意係搵佢哋做政治化妝師，幫政府推銷政策，可惜過去一年幾都未見到成績。唔知心戰室邊位要員諗出嚟，抑或係香港電台都想幫佢哋一把，班副局長會輪流喺港台電視節目亮相，尋日打頭陣嘅係環境局副局長潘潔。
以前都講過好多次，潘潔既唔talk得，亦唔social，曾經畀啲議員鬧爆話好難溝通。鬧得多應該有啲改善喇啩，點知……都係嗰句：冇期望，就冇失望。
佢講嘅環保話題除咗了無新意，佢又扮演人肉錄音機，喺度背書，講嚟講去都係三幅被，話政府致力減排，做好環保回收、環境服務、環保技術開發，特區政府又同廣東省傾緊環保產業等問題云云。
難挽救超低認知度
試問吓，咁點會引到人關注呢？啲市民睇到佢講埋啲咁悶蛋嘅嘢，實即刻轉台或熄機啦！仲話幫政府sell政策喎，似趕客多啲囉！
心水清嘅人都知道，畀呢班副局長出嚟推銷政策，係想順便挽救吓佢哋超低嘅認知度，睇到潘潔咁樣present，凍過水啦！